近日俾兩位藍絲大媽喺港鐵辱罵嘅人民力量立法會議員陳志全，自從受辱後獲唔少市民力撐，就連特區官員都好關心呢件事嘅進展喎。
據聞噚日政制及內地事務局局長譚志源見到佢時，都主動叫佢快啲填表，等當局可以盡快處理佢單case。
乜被人歧視都要填表？係呀！原來慢必為咗跟進呢次因性取向而被歧視嘅事情，一早申明會向政制及內地事務局轄下嘅性別認同及性傾向小組填取投訴表格，慢必引述譚志源話：「早知喺今次會面畀埋（表格）我填。」據知慢必會喺下周交表跟進，至於當局會點處理？當然冇人知，八方反而想知，譚志源幫理不幫親，會唔會被藍絲狙擊？