歐聯決賽，仍在回味「鋒」癲組合點樣摧毀祖記；夏天第一個足球焦點，話咁快到嚟緊本周五早上開鑼嘅美洲國家盃。巴塞MSN三劍俠，「咬人蘇」國際賽停賽可提早放暑假，留低美斯同尼馬內訌，去到智利較技。睇決心同陣容，可早押巴西捧盃。
啱啱禮拜日喺友賽2:0輕取墨西哥，繼續成為友賽之王嘅巴西，目前喺足智彩嘅奪標賠率，同主隊智利以3.7倍並列次熱；美斯嘅阿根廷係2.7倍嘅大熱。巴西去夏世盃1:7慘負德國，球迷猶有餘悸；加埋喺今屆走線上，喺C組要先面對哥倫比亞，呢個世界排名仲比巴西高一位嘅世界盃冤家；若果首名出線，大有可能喺四強要硬撼B組首名阿根廷，所以就算森巴兵團由鄧加再接手後，已錄得友賽九戰全勝兼有七場未失一球，外界仲未敢太睇好。
不過鄧加喺07年已帶領過巴西捧美洲國家盃，佢哋近六屆四捧冠軍；四年前，只係同阿根廷喺八強齊齊互射12碼出局咁破數據（近10屆只有兩次冇阿根廷或巴西喺決賽亮相）。向來重視效率嘅鄧加換血唔少，意圖洗擦國家隊去夏嘅屈辱，中堅重用馬體會嘅祖奧米蘭達拍大衛雷斯，效果初步唔錯。中場可留意賀芬咸嘅羅拔圖法明奴，仲有效力FC山東嘅箭頭迪亞高泰迪利（右），近排喺國家隊頻有「士哥」，會係尼馬嘅重要替補。
近三屆主辦國俱不入前四，智利作東道主六次，亦從未奪冠，何況「山神」阿歷斯山齊士自去夏世界盃後，全季連埋踢阿仙奴，搏足57場，幾乎未休息過；國家隊背負大量擁躉壓力下，唔好睇咁高。巴西當然會怕同列C組、去年兩次碰頭都只係贏對方一球嘅哥倫比亞；但森巴兵交代心切，唔顧得面子，不妨考慮博小組次名，喺上線四強或鬥智利，奪冠機會更高。哥倫比亞部份主力，占士洛迪 古斯、古達度同法卡奧，今季喺歐洲聯賽頗失意，睇吓返國家隊會唔會變身，未見底球隊，半冷冠軍，7.5倍可敲。
阿根廷有美斯，喺B組遇衞冕、但冇蘇亞雷斯嘅烏拉圭，仲係靠辛達告魯斯；同組有上屆未贏過一場但攞亞軍嘅巴拉圭；同陪玩嘅牙買加，阿根廷奪首名出線高唱；但睇番球隊陣容，比去年世盃攞亞軍變化唔大，單係英意西三大聯賽代表佔今次23人中嘅17人，提防經一季拼博，出現疲態。美斯冇咗兩位MSN好拍擋，要破未曾替大國腳捧過重要錦標嘅魔咒，一啲都唔易，捧成大熱有戒心。
波神
電郵：mailto:[email protected]