有朋友本來book晒機票、酒店去南韓， 𠵱家惟有忍痛退訂，仲問費清改去邊度玩好。咁啱劇場評論人梁偉詩最近獲邀參加荷蘭藝術節2015，向費清全力推介阿姆斯特丹。雖然韓圜呢排急跌，好抵玩，但其實歐元都跌得好厲害，大家不妨捨近圖遠，去風車國嘆世界。
荷蘭藝術節一直同法國阿維儂同蘇格蘭愛丁堡藝術節齊名，都係歐洲悠久歷史嘅老牌藝術節。荷蘭藝術節2015由新任藝術總監Ruth Mackenzie擔大旗，曾經策劃倫敦2012文化奧林匹克項目嘅Ruth Mackenzie，喺藝術節開幕表演先聲奪人，引入阿根廷裝置劇場導演Fernando Rubio的戶外演出《Todo lo que está a mi lado》（圖），即係「一切盡在身旁」，乾脆可以叫做「枕邊輕私語」。
#幫你溫柔冚被
枕邊輕私語環節係將一組組雙人床擺喺河畔，觀眾以一對一形式同荷蘭當地女演員同床共寢15分鐘，上演一幕幕Pillow Talk。女演員會輕撥你嘅頭髮，講吓存在主義等等人生大道理，叫你好好享受蔚藍天空，然後就叫你合上眼睛好好想像。河風颯颯，女演員會溫柔咁替你冚被……欲知後事如何，自己去體驗喇。
＃要生計，也要生活 ＃毋忘初衷
費清