有玩具大王之稱嘅百億萬富豪蔡志明養馬多年，近年連帶仔女們如蔡加怡、蔡加讚都做埋馬主，當中蔡加讚係蔡志明孻仔，年紀輕輕未夠30歲，已經晉身CEO行列，家陣係某大鐘錶集團董事會主席，佢同甄子丹太太汪詩詩之妹汪圓圓結婚後，仲做埋老竇，人生夠晒圓滿。「車神」係蔡加讚名下首駒，今季開始服役，原本屢戰屢敗，直至今日第九場再用巫斯義，跑三班千四米，人馬吸取咗上次合作落敗經驗，呢鋪成功反敗為勝，「車神」末段從大外欄風馳電掣般一攻而破，爆出8.2倍半冷win開齋，蔡加讚首次贏馬，賽後同太太汪圓圓拍拖拉頭馬，顯得十分興奮。
可惜嘅係蔡加讚姐姐蔡加怡之「巨無霸」於第四場包尾第14，而蔡加怡亦沒有出現於凱旋門，為「車神」拉頭馬。
第九場「車神」不算太冷，卻開出102倍冷Ｑ，跑第二係連達文接手之25倍冷門「碧科」，落飛馬「勁嘉輝」由柏寶後上第三，啡燈馬由幾十倍打到29倍開跑之「大運舞台」只得第四，落飛黨重注WP悉數泡湯，傷亡慘重！