這天沙田馬場第三場四班千四米發生不幸事件，立法會議員林大輝名下、呂健威馬房的「超奇妙」，全程冇走勢墮後，結果大敗23.5身位跑第14名大包尾，過終點後此駒的右前腳似有問題，摔下騎師楊明綸，之後「超奇妙」成隻翻轉四腳朝天，然後瞓低動也不動，楊明綸及獸醫等工作員檢視牠過後，證實「超奇妙」已暴斃，據知此駒因心臟病發，戰死沙場，至於是否同時腳部受傷，需驗屍才有結論。
4歲澳洲馬「超奇妙」連同這場在港六戰全落第零獎金，質素相當庸劣，但估不到有如此下場，相信大輝一定很傷心。
至於此場頭馬是潘頓策騎的「歡樂一生」，此駒近三場都做二奶，今仗順利幫呢匹新座騎打開勝門，佢同練馬師高伯新季內合作12戰4勝，勝出率有三成幾算好唔錯。
「歡樂一生」以2.3倍大熱身份上陣，沿途守好位，直路初已經於中叠望空標咗出嚟，就咁帶返終點大勝一仗，表現可謂煥然一新，高伯新馬房一吐悶氣，打破咗一個月頭馬荒。此場阿巫接手摩廐「八心之煌」，雖然追唔到「歡樂一生」，但就追過落飛馬「永神駒」入Q，後駒只得第三，啡燈馬「正藍旗」走外叠衝刺一般得第四名。