【鳩嗚乜乜乜】
每次網友講起人情都七嘴八舌，費清同事就為人民服務，綜合準新人、婚禮統籌顧問、酒樓酒店負責人意見，得出最新人情公價表。
#農曆7月擺酒慳錢
摩登大妗姐歐惠芳指，酒店婚宴人情公價約為800至1,200蚊，而高級酒樓就要800蚊。聯邦酒樓集團董事總經理譚兆成話，見到酒樓婚宴賓客亦會畀800至1,000蚊㗎，「冇人會做600、700㗎喇！」近年興酒店午宴、酒店下午茶及雞尾酒派對，綜合業內人士意見，這些喜宴可以做少啲人情，午宴通常500至600蚊人情，雞尾酒派對人情更可低至300蚊。
新人如果想慳錢，不妨破格啲，揀選農曆7月、清明節、重陽節前後，呢類少人擺酒嘅時間。歐惠芳話因少人擺酒，酒席價格會平啲，酒店仲有機會免收平日幾十萬嘅最低包場消費。聯邦酒樓集團董事總經理譚兆成話，喺農曆7月等「特別日子」擺酒嘅新人近年上升約5%，通常可享9折。
玄學家麥玲玲教路，新人可將擺酒及行禮日子分開，雖然喺鬼節擺酒，但就揀「好日」接新娘到男家及註冊，就可以減低影響。
費清
＃要生計，也要生活
＃毋忘初衷
