練馬師孫達志早幾年曾經以一哩王「好爸爸」風靡萬千馬迷，今時今日卻要為15win達標掙扎，不過單係一隻「麟轉乾坤」，季內已經幫佢贏咗五場，證明呢位德國籍練馬師部署馬匹一季多捷，的確有番咁上下功夫仔。
第五場四班泥地1200米的「麟轉乾坤」，季初只得20分，曾陷淘汰邊緣，之後卻不斷進步贏馬。上次因雷神受傷，臨時拉伕用鄭雨滇，結果後上狂勝，取得今季第四捷。賽後加九分升上四班，今鋪換黃皓楠減十磅除笨有精，人馬首次合作就此一放而回，力壓落飛大熱門「現代財星」，成為孫廐季內首匹五捷馬。
皓楠仔連同第二場贏徐廐「故事」在內，全日兩度於泥地由頭帶到尾，繼4月12號後再於沙田日賽起孖。
季內僅餘一個月賽事，孫達志目前仍僅得九win包尾，仲要贏多六場至上到岸，前景並唔樂觀。
另一邊廂，田泰安第四場爆完52倍大冷門「當代沙皇」，第五場騎3倍大熱門「現代財星」，現代不同當代，追極都追唔切，以致飲恨做二奶起唔到孖。呢場三、四名分別係「炸魚薯條」同「快快贏」，四重彩只派七千幾。