中國自動化（569）出售鐵路系統北京交大微聯，大額套現8.11億元人民幣（約10億港元），兼獲厚利。喺嚟緊日子，已經有得炒中自化盈喜。又食住A股超級牛個勢，中自化若果將旗下吳忠儀表資本化，唔難想像，會係交大微聯翻版，中自化嚟多次超肥仔增值！
炒上NAV價 要翻半番
啱啱上周一，中自化完成以10億港元（下同），出售所揸交大微聯全數76.7%權益。呢個售價，係中自化買交大微聯歷史成本價3.8億元嘅2.6倍！享受勁厚變現之餘，中自化因此而大增值同獲利2.9億元，NAV由出售前2.28元，升到家陣近2.6元，實際PB得0.65倍；PE亦由家陣39倍，大跌到得番6倍。而嚟緊半年度成績單，中自化亦已經有得炒盈喜。
好嘢未完，隨住勁厚現金回籠，中自化隨即宣佈贖回價值1.2億美元，折約9.37億元嘅債務票據。就算以當時訂定7.75厘年息計，中自化嚟緊每年利息支出都大慳咗7,300萬元。而呢個數額係中自化上年總盈利4,408萬元嘅1.65倍。中自化業績turnaround速度，肯定加快！
中自化揸咗吳忠儀表全數權益，後邊吳忠儀表，係全國最大嘅控制閥龍頭企業，由成立到其後權益增持，中自化總花費成本，都係4.3億元咁大把。2013年時，祖國《企業家日報》刊載，中自化對吳忠儀表喺A股上市嘅遠景規劃。
家陣祖國狂牛，深A指、深圳中小企指數預測44倍PE、深創業板82倍，而滬A指亦講緊20倍。諗到嘅係，食住祖國超級牛，中自化若果將吳忠儀表資本化，增值肯定超級肥仔！
咪扯咁遠，呢轉買中自化，博盈喜，再博有甜品派送，當上番1倍PB計數，中自化現價（1.69元）要翻過半番到2.6元，而今年PE，都仲未去到雙位數。
錢雋
細價股專家
本欄逢周一、三、五刊出