鄉議局早前嘅領導層改選，一如所料，劉業強喺無人挑戰下，順利喺父親劉皇發手上接過主席棒，成為局方話事人……當然，只係表面啦，事關強仔得以順利接棒，相信連佢自己都知，都係多得啲叔伯鄉紳畀面佢位新界王老竇，花生友聽聞，發叔係想趁住自己影響力猶在，提早畀阿仔登基，以便強仔明年更名正言順選立法會。
「幫強仔掃上位阻力」
其實鄉議局6月1日改選前，局內唔少人都篤定原裝人馬，即係劉皇發拍住兩位副主席張學明同林偉強自動當選，當時局內人都放風，話發叔會拍住舊拍檔再上場，輕易令有意入場玩吓嘅鄉紳打消念頭。但最終發叔卻喺改選前幾日話身體不適唔選，然後對局務未算好多參與嘅強仔突然去馬，典解呢？有鄉紳笑笑口話：「好嘢呢，有時薑真係越老越辣，玩政治，邊個夠劉皇發嚟？」
據聞發叔近年健康雖然隨住年紀大而差咗，但未至於未能照顧會務嘅，「話唔選前嗰幾日佢私下不知幾精神」，而且亦冇人向發叔逼宮，佢根本冇交棒壓力；而由於人人都以為發叔續選，個個都話支持佢連任，「唔通佢話改阿仔上，啲鄉頭會突然話唔支持？佢都幫強仔掃晒上位阻力」。
有鄉紳覺得發叔決定提早讓位，係想阿仔來年接立法會班時更順利，事關有局中人都覺得發仔喺局內建樹未夠多，憑乜代表鄉議局？唔排除有人挑機；𠵱家雖然係強仔做主席，但鄉頭肯定都係睇發叔做阿頭，「只要喺呢段老竇攝政時間內，強仔好好哋幫鄉議局搞好啲嘢，下年去選立法會，班大帝就唔會阿支阿左啦，呢一招，發叔真係好高，佢個仔要學吓嘢」。
花生友