網上噚日流傳一段兩分半鐘嘅短片，名為《2022香港家書》，以「政務司司長林鄭月娥」嘅角度，講述政改通過後嘅香港轉變……當然係變得更壞啦。上傳短片嘅人都叫Carrie Lam，唔通林鄭轉咗性，未卜先知篤爆袋住先壞處？八方發現，條片係林鄭一位相識30年嘅老朋友「傑作」，佢好了解林鄭性情，難怪片中人嘅語調風格甚至用字行文風格都似足林鄭。
CY連任無人能阻
短片講述「林鄭」向長子約希寫家書，講番2017年政改通過後，梁振英喺普選中只獲幾十萬人投票就連任，香港全面配合中央政策，包括電台報刊主編由愛國愛港人士出任、開放邊境讓深圳居民自由出入、承認內地專業資格方便內地人來港工作，但由於CY有幾十萬人投票支持，由佢決定香港點行點走，冇人能左右。
香港搞成咁，「林鄭」話自己都諗唔到：「當年通過政改，我以為可以幫到香港人，但我冇千里眼，也冇水晶球，有啲變化係我始料不及，我內心亦不好受。」
好多網民大讚短片一針見血，據知台前幕後全屬專業水平兼義工，希望令撐袋住先嘅人發現，撐政改其實係好心做壞事；唔知林鄭認唔認同「林鄭」嘅驚世預言呢？睇片可到： https://www.youtube.com/watch?v=Llce6MHMDQo&feature=youtu.be
李八方
mailto:[email protected]