人生之中，總有一樣食物或飲品令人掛念，久不久就心思思想去嚐一嚐，名人都唔例外。
財爺曾俊華雖然外表似薯片叔叔，但原來薯片與雞蛋一樣，佢同樣少食，尤其2009年佢通波仔之後，曾太更加嚴控佢嘅飲食，毋須應酬時，財爺通常食住家飯，午餐都由官邸職員送飯畀佢，餸菜以清淡為主，所以要佢講一樣佢經常食又會介紹畀其他人嘅東西，佢只想到政總飯堂嘅一杯凍奶茶（13元）。
財爺好多時喺星期三下午邀請三數位傳媒朋友食晏聚一聚，話題可以係天南地北，雖然佢講過飲咖啡同睇法國電影係中產行為，佢又肯定屬於中產，但佢本人其實唔好咖啡，食晏到尾聲，佢通常order一杯凍奶茶，仲會推介畀同枱朋友。
老實講，呢杯凍奶茶嘅味道一般，茶味不及灣仔金鳳茶餐廳嘅凍奶茶香濃，不過喺政總呢個總令人感覺侷促嘅環境下，一杯凍奶茶確實可以令人有個唞氣位。
聞說財爺每次開長會，例如每年傾財政預算案，一定搵人近近地喺政總飯堂外賣杯凍奶茶提提神，照咁講，呢杯凍奶茶對財爺決定大家每年有冇得減稅都好重要㗎。
記者：高淑嫻
