拿傑迪錫個入波組織得超靚，維達爾呢場好似食咗火藥咁狂鏟，保方失重心都可以神救，美斯做咗無名功臣，尼馬臨尾又「刷」入球……呢啲比賽片段當然精采，相信大家都識上網搵精華重溫，但一啲賽前賽後嘅花絮趣事，其實同比賽一樣咁值得回味。
最霸氣－碧基搵獎盃「晾腳」
歐聯冠軍獎盃真係好難攞㗎，幾多人恨都恨唔到，如果伊巴謙莫域拎到，實當個盃係寶咁錫。但對於巴塞隆拿中堅碧基嚟講就唔同，隔幾年就捧一次，捧歐聯都捧到悶悶地，不如搵啲新搞作啦──佢竟然搵隻盃嚟「晾腳」，仲叼住支雪茄，扮大爺咁喎！唔知伊巴、保方同波歷克見到呢張相會有咩感覺呢？佢哋追求半生嘅歐聯獎盃，變咗俾碧基用嚟「晾腳」。再睇真少少，碧基呢張相好有潛力做贊助商嘅宣傳照，大家睇吓相入面最搶鏡、最正中嘅位係咩，咪就係嗰兩剔囉！
最吸睛－斑馬WAGs贏番次
歐聯決賽，精銳盡出嘅唔止兩隊波，仲有兩隊球員嘅WAGs，佢哋都好努力為老公或者男友打氣！巴塞方面有碧基女友、拉丁巨星Shakira帶隊，但Shakira掛住湊細囝，所以今場都好唔得閒。至於祖雲達斯嘅WAGs團雖然名氣冇巴塞咁勁，但樣都唔差㗎，例如馬特尼女友法特莉亞同埋保羅普巴嘅女友。不過，佢兩位可能係最後一次為祖記WAGs團亮相，因為馬特尼係AC米蘭借將，而普巴就係全歐豪門爭住搶嘅寵兒，下季盛傳會去皇家馬德里、巴黎聖日耳門或者曼城。
最騎呢－丹尼爾蜘蛛俠上身
係練緊歐陽鋒嘅蛤蟆功，定係蜘蛛俠上身？巴塞右閘丹尼爾（前）賽前爬上柏林奧運球場內嘅扶手電梯度玩，行喺後面嘅尼馬都冇佢咁好氣。丹尼爾即將同巴塞約滿，除咗傳到似層層話去曼聯外，佢賽後又話好樂意去AC米蘭，真係唔知佢最後去邊。其實丹尼爾咁鍾意爬，有份工係幾啱佢㗎──聽聞呢排《復仇者聯盟》搵緊人扮蜘蛛俠，反正佢就嚟約滿，不如寄段片去應徵啦。
最神技－尼馬超強自拍術
巴塞前鋒尼馬（前）最強嘅技術係咩？作為一個鍾意玩instagram、有成二千幾萬追隨者嘅潮人，相信佢嘅自拍技術絕對唔差過球技。尼馬喺賽後扮晒日本仔，戴咗一條寫住「100%耶穌」嘅頭帶將榮耀歸予上帝，又周圍同人影相。不過，相信尼馬同隊友、囝囝影得多都悶啦，尼馬呢次搵埋巴塞自己友球迷一齊玩，佢一舉機，後面嘅觀眾席上簡直群情洶湧，睇番張相，都唔知入面有幾多個頭，如果呢張自拍要tag番晒啲名，真係tag到手軟！
最溫情－阿蘇露齒笑晒口
蘇亞雷斯又擘大口，露出佢棚牙嘞！基亞連尼同伊雲洛域快啲走呀！唔使驚，蘇亞雷斯唔係肚餓或者發牙痕，佢呢次係捧盃捧到四萬咁口箒！第一季加盟就拎三冠王，阿蘇都話估唔到，開心到震。佢賽後帶埋一對囝囡落球場慶祝，一齊同歐聯獎盃合照，露出溫柔嘅笑容！
最豪放－美斯影相剩底橫
美斯囝囝堤亞高好似有啲怕醜咁喎，對住相機都唔笑嘅！梗係啦，爸爸美斯除晒啲衫褲，得番條底褲都照畀人影相！見到呢張相，仲諗起噚日嗰隻小一放榜嘅動新聞，家長興高采烈咁接受訪問，但小朋友就冇乜癮，話唔定堤亞高心入面都唔明點解班大人影得咁開心，快啲俾佢返屋企打機仲好啦。
最好彩－華美倫躺着也奪冠
呢場歐聯決賽引起網上最大迴響嘅，唔係美斯、唔係派路，而係冇出場嘅巴塞中堅華美倫，原因正正因為係佢冇出場！華美倫今季由阿仙奴加盟巴塞，傷咗大半季，成季淨係踢過季尾西甲對拉科魯尼亞一場波，但就咁贏咗三冠王返嚟！今季華美倫上陣一次、零入球、零助攻，攞三個冠軍，奪冠效率簡直完勝美斯、馬勒當拿同比利，成功演繹咩叫「躺着也奪冠」。華美倫亦繼承咗阿仙奴隊長出走後必有冠軍嘅美好傳統，據報佢嘅加盟條款寫住如果有喺歐聯上陣兼拎冠軍嘅話，阿仙奴可以收多400萬歐元；好可惜，華美倫喺零出場之下拎冠軍，搞到阿仙奴見財化水！下次兵工廠賣隊長嗰陣要學精啲喇！
識睇，一定係睇足英台【英波Live】：
http://soccer.appledaily.com
http://bit.ly/engballlive