噚晚結束大馬集訓返港嘅港足，今日會決選23人，準備周四喺旺角場嘅世盃外迎戰不丹；新任體能教練池田誠剛初步分析球員體質後，發現原來唔少港腳嘅脂肪比例超標，雖然教練金判坤冇開名，但據聞頭號肥仔嘜係效力南華嘅右閘積施利喎。
日籍嘅池田早前喺馬來西亞同港足會合後，隨即同球員抽血、驗脂肪比例同心肺功能，結果發現唔少球員脂肪比例同高水平嘅球員比較，係高咗啲，即係偏肥。金帥知道後，立即叫班港腳控制飲食，希望遲啲會有改善喎。稍後會將數據交畀球員所屬球會嘅金帥，都知減肥唔係一朝一日嘅事，𠵱家先嚟緊張都冇用 。
聶凌峰未傷癒勢退隊
港足今日復操前會公佈最後23人大軍名單，聶凌峰左足踝傷勢較預期嚴重，應該連馬爾代夫嗰場外圍賽都趕唔切復出，可能要退隊，至於噚晚先歸隊嘅前鋒高梵，如無意外應該會入選。另外，港腳張健峰噚晚自爆離開傑志，有傳佢會上山加盟南華，球迷拭目以待。