南韓爆發新沙士，報稱暫時無藥可醫，死亡率有四成。回帶睇番2003年香港爆發沙士，令經濟蕭條。香港GDP由4.1%縮至0.9%。今次南韓並非爆發同樣疫症，但如果政府冇及時處理，昨日香港所經歷，明日南韓將會發生。
記得韓劇《妙手天團》講到，醫院為爭取巨額資金而隱瞞接收咗一名感染高度傳染性疾病嘅男病人，院方醫生們冒死搶救。雖然男病人救番，但韓劇還韓劇，理想結局只有電視機先睇到。南韓爆發新沙士後，問過旅居首爾嘅「千姑」（韓文解作朋友）話好多民眾都不滿政府應對新沙士措施。有調查話近七成人表態對南韓政府不信任，當中30歲至39歲嘅受訪者投不信票比例最高，達89.5%。由於新沙士疫情未受全面控，逐漸衝擊南韓旅遊業。當局上個禮拜指有9,500名來自亞洲同內地嘅旅客取消去南韓。消息拖累南韓最大旅行社Hana同Mode股價跌過一成。
新沙士成為南韓經濟最後一根稻草，外界估南韓央行下季減息機會增加。南韓央行對上一次減息係今年3月，指標利率降至1.75厘嘅歷史低位。事實上，南韓經濟弱過藥煲，今年首季實質GDP按季升0.8%，連續4季少過1%；按年亦只升1.1%。當地內需疲弱，加上日圓貶值，衝擊南韓出口業，財政部開口叫央行趁美國加息前，快手減息救經濟。
C+B
本欄逢周一刊出