【本報訊】禾花雀一向是廣東人至愛，本港星晨旅遊早前曾推出團費79元的「一雀三味宴」一天美食團作招徠，宣傳單張更附有貌似禾花雀菜式相片，以薑葱、豉油王及椒鹽花雀作菜單。《蘋果》記者參加了其一天美食團，卻發現花雀宴是乳鴿，團友大呻搵笨。
「等陣中午食嘅係兩個星期大嘅乳鴿，中山客家人叫BB鴿做花雀」。內地導遊文仔在羅湖及深圳灣口岸先後接了23名本港團友上旅遊巴，甫上車便事先聲明一雀三味宴的雀實際是乳鴿，部份團友嘆道：「嘩！有冇搞錯！乳鴿當花雀！」
負責接待的中山蘆葦大觀園餐廳侍應，對BB鴿稱做花雀則不敢苟同，「乳鴿就係乳鴿啦，禾花雀就係禾花雀，點會一樣呢？」其後他得悉導遊將「BB鴿指為花雀」後，即改口稱：「乳鴿都係雀仔嘅一種！」對於乳鴿變花雀，導遊文仔稱：「確係有客人詐型話玩文字遊戲，呢啲就係文化差異囉！」
■記者關震海