容祖兒和李克勤合作9月攻紅館，原來台下兩人私交甚篤，祖兒曾帶男友劉浩龍到李家玩煮飯仔，她還大爆飯局情況，自揭酒量淺逢飲必瞓！今次克兒孖住開騷，一個演唱會睇晒兩大巨星，最貴門票才售$780，唱到上宇宙的G.E.M.紅館騷卻賣$1,880，克勤笑言他跟祖兒好抵睇，因物價上漲才加$100，祖兒更鬼馬說：「我哋係地球價！」
撰文：余燕儀
容祖兒和李克勤於11年前舉行拉闊音樂會，當年曾約定再攜手開騷，將於今年9月圓夢孖住踏紅館。日前克兒在西環接受本報專訪火花四濺，祖兒說：「自己單挑咗好耐，終於搵到情投意合朋友，諗住分擔做騷簡單啲。」克勤搖頭說：「原來唔係分擔重擔，100磅變50磅，反而孭咗300磅嘢。」祖兒笑問：「咁點解你做完『左麟右李』，經歷過咁辛苦現象，由一個氹跌落另一個氹呢？」克勤答：「正如啲人問生小朋友一樣，咁辛苦又生第二個？因為嗰種喜悅可以彌補。」
認帶師兄見克勤
兩大巨星合作開騷，以為門票一定叫價不菲，事關後輩宇宙巨G.E.M.的紅館VIP飛開價$1,880，克勤說：「我哋$780啫。」祖兒抵死說：「我哋係地球價，唔好同人比較。」克勤笑笑口說：「嘻嘻嘻！我唔敢有反應。」祖兒反問：「乜事呀，好好笑咩。」問怎睇後輩門票賣到千多元？克勤說：「唔能夠用價格定斷，由$680變$780因為物價上漲，同埋我哋個騷係抵睇，平時各自都$680。」祖兒搶着說：「唔係呀，其實價格都未公佈，不如再升囉，變大氣層價……哈哈，講吓啫！」
另外，談到兩人的交情，祖兒說：「得閒佢會叫我去佢屋企食飯，嗰幾年其實自己冇乜時間結交朋友，好感動2006年佢帶老婆嚟睇我個騷，佢話老婆好鍾意我啲歌，開頭以為係客氣說話，但見到Emily（盧淑儀）真係識唱我嘅歌，感覺好開心。」克勤鬼馬說：「後來又見到你長大……」祖兒大方承認帶男友劉浩龍（師兄）到克勤屋企，她答：「開頭我單頭去佢屋企，之後朋友圈越嚟越大。」克勤說：「帶嚟帶去都係嗰個啫，哈哈哈！」
祖兒係地獄廚神
問克勤覺得祖兒和師兄襯嗎？克勤賣口乖：「最緊要佢哋覺得襯，外人唔重要，最緊要兩個人開心，其實飯局仲有好多人喺度，當然我哋四個人都有，你都係想聽呢啲。」祖兒主動豁出去對記者說：「不如講啲你好想聽嘅嘢，例如飯局情形，係咪好興奮呢？我覺得自己同佢哋唔同，佢哋成班都係飲得之人，而我係最唔飲得嘅，好多時候佢哋負責飲，我就負責瞓覺，飯枱隔籬有類似梳化位嘅窗台，每次我都要瞓一瞓先安樂。」
克勤取笑說：「佢飲一杯香檳就瞓，唔知點解冇酒量。同埋佢係真正地獄廚神，帶好多材料同烹飪書嚟整意大利飯，睇佢切嘢有板有眼，問係咪你撚手小菜？佢話其實未煮過，好欣賞佢嗰種冒險精神，兩個幾鐘頭後問係咪食得？佢話煮緊個汁啫。第二次仲犀利，原來拉姑（狄波拉）教佢喺泰國餐廳買雞翼嚟炸。」祖兒駁嘴說：「拉姑話炸都要功夫㗎。」問地獄廚神將來怎做好老婆？祖兒得戚說：「其實我仲有蕃茄炒蛋同蒸水蛋，真係撚手㗎。」
容祖兒服裝：Carven
化妝：Hubei Har
髮型：Heibie Mok and Jacky Tsui of Hairculture
場地：尚品薈