歐陽震華（Bobby）在無綫工作超過30年，拍過《壹號皇庭》、《陀槍師姐》等經典劇集，但這位收視福將最近竟不獲無綫續約，令好多藝人和網友大跌眼鏡。據悉Bobby經理人Lydia和無綫製作資源部總監樂易玲傾談合約期間發生爭拗，傳有人「假傳聖旨」，並拋下一句「有啱先搵你」，最後不歡而散。
上老友屋企解憂
Bobby前晚暫且拋開煩惱，到朋友的跑馬地家中談天至凌晨近兩點。Bobby到附近油站取車時，見記者亦感愕然：「我上個friend屋企睇電視，你哋等咁耐呀？」Bobby穿上一身襯到絕的粉藍色套裝，但下巴鬚根變白，望上去有點滄桑。他被問續約事件是否已解決？他笑說：「等經理人搞。」有沒有不開心？他說：「冇冇冇，最重要大家得個明白、有個交代啫，我同TVB關係咁多年都非常好吖，係咪？！」不獲續約是否好突然？他想了一會說：「掉番轉頭講，可能有人表達啲嘢，或者我經理人接收嘅嘢有啲出入，呢樣嘢大家求個明白、求個真實啫。我亦唔想有邊個演繹錯咗我哋嘅立場，其實冇TVB都冇我，我想大家有個了解，非常簡單。」
由曾勵珍接手傾
有指Bobby會揀劇及揀對手拍劇，而樂易玲接受周刊訪問時亦透露Bobby之前身體出現問題，夏天不可以開工，故此製作部謂需要「諗諗」新合作形式，最終藝員部建議三年兩部劇，Bobby經理人Lydia便提議「有啱嘅再傾」。
但事件變成了羅生門，Lydia昨日在電話中否認有講過，並說﹕「佢意思係有啱先搵我地啦，仲主動解釋，第日有嘢啱時，就搵我地去簽一年約，佢係咪將我repeat佢啲句子當係我講呢？」
據了解藝員科經理何其穎亦在場，大部份時間由樂小姐發言；事件曝光後，集團行政總裁李寶安即落令由戲劇製作總監曾勵珍接手傾續約，問是否太多是非？Lydia表示：「咁大間機構實有，有啲人形容係佢哋公司內部問題，人哋話演員走晒，製作部咪冇人用。我唔係加鹽加醋嘅人，如果find out係公司意思就心甘命抵，但唔係嘅都要畀公司知，有人拎住公司卡片原來咁傾嘢。我都有同珍姐講唔好意思，人哋係做製作部，出埋佢份糧，好似要做埋人哋啲嘢，係咪先？聽人講珍姐都幫好多藝人傾合約，我哋都唔係第一個，但唔明點解咁多合約去咗珍姐度傾呢，大家諗啦！」
採訪﹕徐錦池、嵐山
攝影﹕羅德光、吳耀輝