有「玩具大王」之稱的富豪蔡志明養馬多年，佢三個仔女蔡加敏、蔡加怡同蔡加讚，受到爸爸薰陶下，亦對賽馬產生興趣，先後成為馬主。
今期(7日)沙田賽事，蔡氏姊弟組成兵團，加怡隻「巨無霸」同弟弟加讚嘅「車神」將會分途上陣，分別跑第四及第九場，都係三班1400米，如果有馬贏，咁凱旋門就有機會見到呢對姊弟一起拉頭馬。
「巨無霸」同「車神」都係由大摩訓練，咁啱同日出賽當然唔係巧合，大摩叫得佢哋入場，兩隻都輸咗嘅話，試問大摩如何交代？有咁嘅安排，反映大摩有一定信心贏馬。「巨無霸」早前在港初出即跑第三，質素一定唔差，雖然之後冇乜表現，但今次唞夠復出，話唔定會有突破。而「車神」目前評分比早排入Ｑ時低，四歲愛爾蘭馬越來越成熟，當然亦係爭勝要角。
蔡加怡年紀輕輕，已係市值百五億之康健國際醫療(3886)主席，康健本月公佈獲中國人壽花17.5億進駐加盟成為股東，呢個超級國企巨無霸加怡都啃得落，試問區區一隻沙田「巨無霸」，又點會搞佢唔掂？