有線趁歐洲同本地球季完晒，暑期再製作新一輯《體壇圓桌》，今年唔講其他，集中講升咗呢做「港超」嘅本地波，除咗有主持劉健基同恒常嘉賓李德能外，仲廣邀球圈唔同界別代表嚟討論本地波，首集今晚10點喺足球台播出，而頭炮主題就係「港超聯得個名？」睇個名已經夠晒爭議性，出席嘉賓包括球圈大好友嘅足總董事伍健、標準流浪總監李輝立、大埔秘書長陳平同講咗本地波幾十年嘅何鑑江。
嘉賓寸爆政府唔配合
節目中幾位球圈人士就港超聯係咪「換湯不換藥」激烈討論，包括入場人數、球會貼錢踢波、區隊冇資源同青訓等問題，好友、淡友講到充滿火藥味；伍生開波就話計埋亞協盃入場，今季平均每場有1,200人，何老鑑聽到，就寸佢亞協盃係外隊賽都計㗎，仲話足總每年收咁多錢，但政府啲政策唔配合，搞唔好場地等硬件，有錢都冇用，點解足總唔向政府反映喎。支持本地波嘅球迷，記得留意播放時間，睇吓有幾激喇。 （有線61台今晚10:00pm錄播）