【本報訊】《大時代》掀起深宵追劇熱潮，結局在即，網民大呼不捨，倒是當年參與編劇的龍文康最冷感，「屋企電視，長期冇插電……」不是寸嘴，只因實在忙，由初出茅廬「跟大佬」學編神劇《大時代》，到擔大旗編審《老表，你好嘢！》，犯險喻中港矛盾。23年過去，他又重上劇場，與香港話劇團合作，下月推出時代諷喻劇《維港乾了》，「試諗你，你有層樓，望到維港，你話幾值錢？若維港一夜間消失，你會點？」慨嘆樓價必跌？哀悼沒有維港的香港，不再是香港？仍租住西環唐樓的大編劇，有話要說。
記者：呂麗嬋
「試過有次坐的士，由西營盤去灣仔，短短10分鐘路程，塞咗好耐車，個司機把幾火，發晦氣話：填平咗個維港最好，咁就又有地，又唔使塞車。呢啲當然係氣上心頭嘅說話，但嗰一剎那我就諗，若果維港真係乾咗，係開心定係會更煩？」
故事由一個香港尋常家庭開展，準備出售面向維港舊樓單位套現，卻遇上維港乾了，有喜有悲，時代變遷下香港人不同的價值觀，荒誕又真實，堪稱一個人的大時代。
「每個人，都有屬於自己嘅大時代」。這個大時代，可以是23年重播仍掀起熱潮的神劇、可以是大起大落的真實股票市場，也可以是血債未償的天安門廣場，甚至是雨傘運動下的軒尼詩道，時年17的龍文康，卻是中學會考，「考咗兩年都考得唔理想，我個年代冇𠵱家咁多出路，升唔到中六，又唔想讀工業學院，前路茫茫，咁啱電視台開編劇訓練班，面試肯收，就入咗去」。
劉松仁跪求老闆出糧嗰幕，係我負責，監製話得，就去上版。
年逾40的他說：「每個人成長，或多或少都有自己想做嘅嘢，作家夢、DJ夢，嗰時中學畢業，想做編劇，入電視台係唯一途徑。」
流水作業的電視台，可以是創作的墳墓，也可以是磨練銅皮鐵骨的少林寺。走過木人巷，不會再一樣，「簽約時未夠18歲，仲要阿媽簽名，但由學校跳到一個大機構，見到乜，基本上都覺得好新奇」。年輕的好處就是沒有包袱，龍文康訓練班畢業後，順理成章留下。
未夠廿歲，他被欽點加入「地獄組」，跟隨出名要求高的地獄監製韋家輝度橋，參與創作《大時代》，「喺個組我年紀最細，電視劇啲劇本都係集體創作，BUY你條橋就接住寫，劉松仁跪求老闆出糧嗰幕，係我負責，監製話得，就去上版」。
大企業下的螺絲釘，關埋門困獸鬥，那些年的狗臉歲月，卻是他人生之中的大時代。其後離開無綫，入讀演藝學院，畢業後寫下台北文學獎得獎作品《浮沙》，又與爾冬陞等合編電影《門徒》，為他贏過金像獎提名，有成有敗。
每個編劇，心中都有好多個古仔，差別在於會唔會寫出嚟。
2005年，從不寫blog的他，寫下手機小說《17歲的大時代》，無心插柳，竟然憑夫子自道式的小說，做了第一代網絡作家，「每個編劇，心中都有好多個古仔，差別在於會唔會寫出嚟，中學會考係時代產物，8萬人考會考，6萬係loser，一定有市場」。他還是信心滿滿，只因他正是那6萬分之一。「同朋友傾偈，好多3、40歲，做咗爸爸都好，仍然發夢自己考公開試，成功好、失敗好，都係人生大事」。
都說「考試只是人生的一部份」，大抵，智慧之言大都出自過來人的口中，身在其中，就自然成了頭頂的一片天。
故事虛構，卻有着他17歲加入編劇訓練班前的真實心情，10年前，網絡不如今天盛行，走得前的他，創下25萬瀏覽量的紀錄，「條路點走，好少回頭睇，但咁多年，仍然可以創作，已好幸福」。當年的編劇訓練班共15人，仍留在行內的只有2、3人，「死剩種」龍文康如是說。
兩套作品大受歡迎
【1992】
■《大時代》劉松仁跪求老闆出糧經典一幕，出自龍文康手筆。
【2013】
■以合作方式回歸無綫擔任《老表，你好嘢！》編審，戲喻中港矛盾成話題作。
