對不起，這一次我覺得《100毛》真係好心做壞事。那個乜佬物佬表，鬼佬又名洋腸鍾意飲Perrier身邊梗有黑超香水味最濃，麻甩佬又名臭男人鍾意食煙身邊梗有馬經都係煙味最濃，還有肥佬又名死肥仔鍾意食所有嘢身邊梗有手巾仔汗味最濃，我都一一畀面笑咗，但輪到基佬登場，又名同性戀者已經很乏味，鍾意食咩、鍾意飲咩、蒲開邊、身邊梗有和咩味最濃各項，居然全部得到悶到爆的「冇乜特別」，妖，面目模糊在芸芸人海毫不起眼，咁你即係當我透明啫！雖然我明白這班貌似冇乜搞基經驗的毛孩，睇唔過眼地鐵野蠻八婆惡行，以實際行動證明「基佬都係人，平時習性都同普通人冇乜分別」，挺身而出為遭歧視的少數族群仗義執言，可是無色無臭到完全缺乏性格，豈不是等於隱身，一個唔該間接被送回衣櫃裏？
既然其他各種佬都不怕得罪，嬉皮笑臉把坊間盛傳的stereotype加到他們頭上，為什麼要小心翼翼優待男同志，就住就住隱惡而不揚善？是的，我們和路人甲乙丙沒有任何分別，所以一樣有可笑的缺點、戒不掉的壞習慣和無可救藥的低俗品味，譬如鍾意食香蕉食香腸，而且是雜食和不停食，鍾意飲粉紅香檳、童子尿和頭啖湯，不分日夜蒲同志交友網蒲公廁，身邊梗有嘰嘰喳喳的好姊妹，後生時精味最濃，老來息影女星味最濃，這些公開的秘密何妨清心直說，難道你以為據說心胸淺窄的我們一點幽默感也沒有？就算夾硬屈我鍾意食屎鍾意飲砒霜身邊梗有衛生巾，還有娘味濃過康城影展紅地毯的冰冰冰冰，都好過沒顏落色的「冇乜特別」呀。