「神之子」返嚟喇！上月尾葡甲煞科戰終為葡萄牙體育會「地標」上陣嘅前港足隊長歐陽耀冲，難忘靚媽煲嘅靚湯，日前低調返港度假。不過，神之子強調來季仍然會喺葡萄牙「搵食」，至於踢邊隊，佢就神神秘秘咁話兩個禮拜後先講得喎！
年僅25歲嘅「歐冲」，雖然等足一季，上月尾先有機會喺對奧漢倫斯嘅煞科戰，後備落場踢咗20分鐘，但總算成為香港名宿張子岱喺1961年效力當時英格蘭頂級聯賽嘅黑池後，54年嚟第二位港將喺歐洲賽場亮相，並幫球隊以1:1媾和對手。
儘管葡體會護級失敗要降班，但歐冲賽後都喺左手踭添加紋身，以紀念自己首次喺葡甲落場。呢位前港足隊長禮拜三仲低調返咗嚟香港度假，佢話自己一個人喺葡萄牙成年，最掛住就係屋企同埋靚媽煲嘅靚湯。至於港足禮拜四就會喺旺角場上演嘅世盃外首戰對不丹，問佢會唔會入場支持港足，佢就話︰「未知，睇吓到時得唔得閒先。」
講到來季前途，歐冲話目前仍安排緊，但就強調一定會繼續喺葡萄牙「搵食」，下月就會返當地報到。不過，佢來季係咪會隨葡體會角逐葡乙，定係加盟其他組別嘅球會；佢同埋佢嘅經理人阿拔口徑一致，仲賣關子叫大家拭目以待喎，「歐冲嘅良民證經已搞掂，但畀多兩個禮拜我哋，有消息會再通知大家！」