年屆79歲有「新界王」之稱嘅劉皇發，退任鄉議局主席，由兒子劉業強頂上此稱位。其中一個最開心嘅，當然係阿妹珠啦！邊個係「妹珠」？咪發叔太太劉吳妹珠女士囉。發叔精心部署退休，自然一心多啲時間陪太太，咁啱佢哋兩公婆合夥嘅馬匹「龍船鼓響」將喺周日(7日)在港首次上陣，話唔定發叔、發嫂可以拍拖拉頭馬。
「龍船鼓響」來港前五戰，首三仗在法國獲兩冠一亞，第四仗遠征德國挑戰1400米三級賽，結果一放到底，以四馬位之先大勝。之後返法國跑1400米一級賽尚盧利加迪大賽，全程未能望空受困才落第，但亦只不過落後三馬位，而且該役季軍Gleneagles其後連取英、愛二千堅尼大賽，所以「龍船鼓響」今場跑三班隨時超晒，角逐1400米亦可以話係首本路程。
劉業強表示「龍船鼓響」係佢挑選來港，父親以前有匹「龍船義浩」由已故方祿麟訓練，所以「龍船鼓響」由方祿麟之子方嘉柏打理，亦順理成章。劉業強指「龍船鼓響」今仗初出爭1400米合適，未來則可以向較長路程發展，隻馬來港初期情緒有少少急躁，但經過方嘉柏悉心調教，已日益穩定，狀態亦正不斷冒起中，希望今仗有好表現喎！