唔係話美國人好戰，不過你睇戰爭game有幾大行其道，由N年前隻《Rainbow Six》到𠵱家嘅《Call of Duty》系列，集集都賣到爆晒廠，一槍shoot頭幫敵人埋單，又真係幾有快感嘅。挾住幾項奧斯卡提名，呢個禮拜都係呢套《美國狙擊手》藍光碟最受熱捧。雖然電影最後只攞到最佳音效剪接獎項，不過綜觀中外影評人，都對老而彌堅嘅導演奇連伊士活讚不絕口，失落奧斯卡最佳影片，實在可惜。
除咗小島秀夫隻《Metal Gear Online》game外，龍叔叔基本上對其他第一身射擊game提唔起興趣，對戰爭電影亦然，邊行邊射真係非龍叔叔杯茶。今次揀咗《美國狙擊手》嚟煲，絕對係一廂情願地希望重遇十四年前《敵對邊緣》帶嚟嘅震撼劇力。若你有同樣諗法，《美國狙擊手》就唔啱你「合尺」喇。事關電影改篇自真人真事，講美國一位傳奇狙擊手，喺伊拉克殲滅塔利班嘅英雄事迹，勉強叫做敵方都有個神槍狙擊手較量吓咁啦，不過想睇《敵對邊緣》咁，兩大sniper鬥智鬥力雙雄較勁，今次難免會失望而回。
真人真事冇陰功
話雖如此，呢位嚟自德州嘅神槍手Chris Kyle，自細俾老竇教導成要做救人嘅牧羊人，大個咗經歷911事件後，觸發起參軍雄心，跟手做埋狙擊手，眼界仲鬼咁準，一生擊斃一百六十名塔利班成員，解救咗好多同袍困境，成為美軍中嘅傳奇英雄。奇連伊士活真係有料到，喺戰場上加入好多細碎場口，令到電影帶出一種戰爭嘅恐怖同殘酷，其中一幕女人同𡃁仔拎住俄製反坦克手榴彈，準備衝入美軍中自爆，主角已經老遠瞄準緊，換轉係你會唔會開槍殺婦孺？主角來來回回伊拉克幾次，每次打完仗返老家，精神都變得更繃緊，少少風吹草動都會緊張起嚟。美國狙擊手唔似美國隊長咁天下無敵，更為有血有肉，就算娶咗靚老婆，生埋一仔一女，為幫隊友報仇，都要掉低屋企人重回戰場。故事雖然拍得細碎少起伏，但你會越睇越投入，想知主角報唔報到仇，兩粒幾鐘不經不覺咁過去。由於係真人真事，唔算劇透，結局居然係主角平安退役後，被自稱精神錯亂退役軍人槍殺，神槍手一生戎馬沙場，結局如此實在欷歔。
漆黑一片有條理
電影唔係sell娛樂性，不過有幾幕都拍得相當精采，好似黑夜巷戰，靠微弱街燈同月光深入敵陣，氣氛相當緊湊，而且燈光佈局得好，黑漆漆都可以好清楚咁交代緊邊個打邊個，藍光碟喺畫面黑位細節表達上，屬上佳表現。另一幕係美軍俾人包圍喺一幢大廈入面，全靠突如其來嘅沙漠風暴，掩護住殺出重圍，喺沙暴入面開戰，畫面蒙過蒙面超人，但仍有本事拍出條理，不禁佩服「奇哥」嘅藝高人膽大。
杜比聲效都要讚，坦克駛過低沉聲頻、狙擊槍迴響等，都屬水準以上，不過始終埋牙場面唔多，刺激性唔夠緊密，龍叔叔意猶未盡，拿拿聲拎番隻《敵對邊緣》出嚟煲多次，再call番班舊戰友，約戰《Metal Gear》止下癮先得喇。
編輯：黃仲兒
美術：楊永昌
龍叔叔
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie ）
