中超班霸廣州恒大淘寶（簡稱恒大）由兩大企業恒大地產同淘寶擁有，冇乜嘢多，就係錢最多，所以簽入球員同教練，都要咁有星味得咁有星味。咁啱恒大就喺六月四號呢個敏感日子換帥，由前巴西國家隊教練史高拉利（大菲）接手，成為恒大第三位有世界盃冠軍經驗嘅教頭（見附表），有傳因為主教練納比準備離隊，於是激嬲老細，可憐「大簡」簡拿華路做咗212日就落台，成為「廣州莫耶斯」。
一早斟掂大菲接任
恒大星期四晚主場僅逼和天津泰達2:2，賽後大簡就接到大信封要走人，不過球會立即出埋大菲接任兼簽約消息，即係代表周四晚戰果如何，大簡被炒都已成事實。
話就話恒大今季戰績一般，中國足協盃已經出局，不過亞冠盃假假哋都打入八強，係中超唯一殺入八強分子，中超聯就算失分，都仲同山東魯能並列榜首，以得失球差僅排第二，大簡咁樣落台真係有啲慘情。
國內傳媒就將大簡比喻為前曼聯領隊莫耶斯，話莫帥接手曼聯，係獲得前任領隊費格遜「欽點」；大簡都係獲師父納比力捧，但呢位廣州「the chosen one」教唔到一季就下台，仲快過莫耶斯。其實大簡深得球員歡迎，據報周四賽後廣州更衣室傳出有球員喊聲，門將李帥就喺個人微博打出心碎圖案，前鋒郜林就留言話「這就是職業足球」。
球員哭別留言力撐
納比都幫大簡講好說話，話廣州管理層短視，但大簡走人反而可能同師父有關，話說納比早輪返廣州，向恒大高層講，正接洽歐洲一支國家隊教練，仲話事成後就想帶返成批意大利助教團返歐洲，可能因此激嬲恒大，嬲嬲哋先下手為強。
講真，納比時代引入嘅意大利兵都開始淡出，好似前意大利國腳迪亞文迪、基拿甸奴等已經回國，𠵱家恒大四個外援列卡度高拉特、阿倫杜格拉斯、艾傑臣同祖尼亞都係巴西人，同大菲同聲同氣。無疑恒大教練名氣就夠，納比同大簡一個係教練，一個係隊長，幫過意大利拎06世界盃，大菲就02年領巴西捧世界盃，但大菲之後運勢每下愈況，帶葡萄牙歐國盃屈居亞軍，入主車仔仲唔夠一季被炒，上年領巴西踢世界盃亦四強止步。不過咁，恒大勝在人民幣多，大菲冇成績？咪又炒過換人囉。
識睇，一定係睇足英台【英波Live】：
http://soccer.appledaily.com
http://bit.ly/engballlive