【本報訊】陳志全（慢必）因性傾向在港鐵捱罵引起巨大迴響，上載影片一出即40萬點擊。慢必謂3分鐘的辱罵具正面意義，「政府話歧視唔嚴重，唔使立法，呢個就係活生生嘅仇同例子」。平機會就現行歧視條例的檢討報告即將出爐，他希望風波可引發討論，為爭取反歧視法開路。
記者：呂麗嬋
「如果佢哋話我係垃圾議員、拉布，逢中必反，至少係針對緊你嘅政績，但佢哋99%指罵你嘅內容，都係關於你嘅性傾向，仲要好多觀念係錯嘅，比如同志都係賤格，等同冇J、一定係趴喺度做女人俾人fxxk，唔單止侮辱男性，連女性佢哋都侮辱埋」。「挑基3人組」的辱罵內容「十講九錯」，平機會亦指行為不能容忍，但慢必苦笑謂只是冰山一角。
每月被辱罵兩三次
「細睇影片下面近千個留言，大約兩成人認同鬧得好，3人組隨時係呢兩成人嘅英雄」。在地鐵被罵，原來並非首次，「之前喺地鐵，有位阿叔鬧咗我3個站死基佬，條片40幾秒，一樣上載咗去YouTube，只係嗰次冇咁多性器官，迴響冇咁大」。
自當選、出櫃、承認同志身份，慢必謂針對他性向的攻擊多不勝數，「喺街度行，成日有人突然行近，細細聲喺我耳邊叫死基佬，然後極速閃開」。
小學雞式「快閃黨」每月總遇上2、3個，還未計城市論壇獲贈碌柚葉籲「洗屎忽」，「車廂空間細，遇上地鐵恐襲，係真正困獸鬥，唔想互相指罵，保持沉默，用手機拍低，放上網等公眾評論，係最好嘅非暴力抗爭」。自影片上載，3人組的惡形惡相，不單惹來專欄作家口誅筆伐，有網民更揚言會引用不能粗言穢語的地鐵附例投訴，以儆效尤。
擬動議「民事結合」
「如果單純為報復，意義不大，甚至可能會落入明光社『逆反歧視』陷阱。類似歧視一直存在，只係以前影唔到、冇人留意，如果唔正視同立法，你今次可以引用地鐵附例，下次喺街被罵又如何？」進入平權運動關鍵半年，平機會最快於本月17日政改表決後，公佈歧視條例的檢討報告，他說希望小風波可引發更多反歧視的社會討論，超越單一私人恩怨，意義更大。
除了平機會報告，慢必透露，稍後他會提出「民事結合」（Civil partnership）的動議辯論，「以前一講平權運動，成日話三部曲循序漸進，先就性傾向歧視立法，再講類似關係法嘅民事結合，最後先到同志婚姻，𠵱家希望兩條腿走路，除咗反歧視，同時落實長期一齊生活同志伴侶如手術簽紙、領取遺體嘅法定權利，真正保障到性小眾嘅權益」。被罵若能引發社會正面討論，慢必笑說犧牲總算值得。