政改就快表決，歐盟駐港代表同十幾個歐洲國家領事，近日先後約見不同黨派嘅立法會議員討論政改，其中建制派議員喺會後就引述英國駐港總領事吳若蘭，話佢十分支持袋住先喎。英領館最初接受傳媒查詢時，唔肯講吳若蘭係咪真係咁講過，直至報道出咗街，英領館覺得唔對路，噚日先回覆話吳若蘭冇咁講。
英領館重申，支持2017年過渡至特首普選，未來進一步進行民主改革才最能保障香港嘅繁榮穩定，至於通過與否由立法會決定。
不過，唔少泛民就話之前見吳若蘭時，佢言談間其實都係支持通過政改，認為咁樣可以增加泛民與中央嘅互信，所以泛民一早已唔覺得呢啲「外部勢力」係同路人。工黨李卓人直情話，如果要靠呢啲外部勢力爭取民主，真係死得！