中小學讀天主教男校，自小已知自己性傾向，不近女色。陳志全在愛情上很專一，大一才正式初戀，一拍12年。第二段戀情以為修成正果，男人四十，由娛樂圈縱身投入政壇，首次參選就順利入立法會，成為史上首個出櫃議員。
半被動出櫃
成為公眾人物，無奈令他賠上良緣，「佢係一個好低調嘅人，好驚俾人知佢嘅性傾向，連做gym都唔會同我一齊做，我參選，佢好擔心同志身份曝光」。失戀至今3年仍然單身，見光死愛情成了性小眾宿命。
「當年我出櫃其實係半被動，有記者收到風，一係否認一係承認一係唔答，唔答即係默認，咁不如大方承認」。慢必說出櫃後早有被鬧「死基佬」的準備，最痛苦反是因公眾人物身份「冇人埋身」，「擔心同你食飯會俾記者影，俾人話係基佬；有啲朋友會唔肯同我搭地鐵，唔肯同我一齊喺好多人嘅地方食飯」。
香港對同性戀者的接受程度日增，但陳志全說，不少人其實仍承受巨大社會壓力，「自己可以大方承認，唔代表你嘅伴侶可以，好多時以為有好嘅發展機會，對方一知你身份，就打退堂鼓」。「我成日諗，如果我仍喺衣櫃入面，對平權議題，我仲敢唔敢講嘢，敢唔敢行到咁前？」
■記者呂麗嬋