馬來西亞沙巴噚日朝發生六級地震，我求大俠當然第一時間問吓正喺吉隆坡集訓嘅港足有冇事，中場林嘉緯就話因為沙巴距離吉隆坡好遠，所以感受唔到震動，不過喺當地都好快知道地震發生。
今晚8時45分就會同馬來西亞國家隊「拍跳」嘅港足，教練金判坤噚日出席賽前記者會時就講得好清楚，上場友賽係為不丹做演練，對大馬就係為對馬爾代夫試陣，想睇多啲唔同人選嘅效果，所以今仗陣容會有唔少變動。至於啱啱歸隊、效力中超石家莊永昌嘅白鶴（右），因為近期少比賽，金帥話會盡量畀佢踢多啲。由於係試陣，勝負屬其次，所以金帥叫大家唔好抱太大期望喎。
另外，足總公佈，旺角場今日開始預售下周四香港對不丹，同埋呢個月16日對馬爾代夫嘅世盃外門票，球迷唔想臨場先買，去開旺角就順便買埋喇。
識睇，一定係睇足英台【英波Live】：
http://soccer.appledaily.com
http://bit.ly/engballlive