等到頸都長，美國NBA季後決賽卒之在美國時間六月四日開打（香港時間六月五日上午），執筆寫文時，尚未知道第一場嘅勝負。
今年決賽要等咁耐，皆因東西兩岸之決賽，好快就打完，係事先諗唔到嘅。譬如東岸一哥阿特蘭大鷹隊在常規賽取得60勝佳績，在一月份曾連勝17場，點知道鷹隊可能在常規賽就因為打得太好，入到季後賽就有疲態，好辛苦咁贏咗布魯克林網隊與華盛頓巫師隊之後，師老兵疲，主力球員受傷，對住克里夫蘭騎士隊，就俾富於決賽經驗嘅勒邦占士殺得落花流水，以零比四場數敗走麥城。鷹隊教練團畢竟欠奪標經驗，唔似得聖安東尼奧馬刺隊班老教練老將咁識得留力，在常規賽見好即收，點到即止。
唉，可惜呀，馬刺隊計唔到第一圈就要打足七場，至最後一秒輸咗俾LA快艇隊，可謂人算不如天算也。
西岸方面，金州勇士隊橫掃千軍，對住有占士夏登嘅侯斯頓火箭，輕鬆以四比一取勝，因騎士與勇士提早完成七場四勝任務，全世界球迷要等足成個星期，先至見到決賽開鑼。勇士基地在Oakland（渥克蘭），本是一個較窮城市，但因與三藩市只有一條大橋之隔，三藩市灣區係矽谷繁華地，居民有錢到極，決賽門票炒到一千一百美元一張，騎士位於舊經濟城市克里夫蘭，市民收入較低，門票只係炒到五百餘美元啫，於此亦可見美國地區貧富懸殊。
兩隊邊個更有鬥志呢？勇士隊40年來第一次入決賽，而灣區球隊如美式足球之三藩市49人，棒球之三藩市巨人均曾紅極一時，只有籃球長期俾LA壓住，今年係最佳顯威風機會。
克里夫蘭更慘情，籃球年年輸，足球嘅Browns，棒球嘅Indians年年失威，令俄亥俄州十分氣餒，今季有勒邦占士捨棄米亞密，肯返鄉下，竟然殺入決賽，占士呢位目前全世界最全面好波之籃球超級巨星，梗係想在鄉親父老面前威威啦。
翻查資料，原來占士與勇士嘅人氣三分王居理，同是在俄亥俄州Akron市出生，同埋鄉下嘅，你話如果居理有樣學樣，願意離開繁華煙花地之三藩市灣區，投奔故鄉騎士隊，與占士合作，咪好唔得掂？不過美國人打波，對鄉情從不講究，占士對居理，會係一場世紀大戰。