家住山頂嘅自由黨田北俊，平日鮮有踏足新界同九龍，不過為咗調理身體，田少最近不惜紆尊降貴，過海到旺角睇中醫。田少噚日喺fb貼咗一張自己手持藥方喺中醫診所嘅相（圖），借題發揮喺facebook話：「希望香港可以快D（啲）藥到病除啦！」有網民就不忘寸爆田少：「你自由黨都有責任，連呢啲普選方案都同意通過，仲好意思講藥到病除？」
但何解田少會去睇中醫？田少同八方講，近排食咗好多佢最喜歡嘅煎炸食物同牛肉，搞到有啲滯滯哋，所以搵中醫調理一下。田少話，平日佢都係打個電話畀中醫師，跟住叫司機去攞藥，但今次醫師要田少親身嚟俾佢望聞問切，所以田少先會去旺角咋。