小一統一派位今日放榜，教育局又再留難傳媒。今日有兩個本土派組織會到位於上水嘅香海正覺蓮社佛教正慧小學嘅跨境學童派位中心外示威，抗議雙非搶學位。正慧小學校長梁翠珍噚日話，唔會畀記者進入校內，佢再三話係教育局「落閘」，應該係回歸以來，教育局首度禁止傳媒入派位中心採訪。
多間傳媒噚日一整日同教育局周旋，但局方發言人傍晚話，「由於有團體表示明日會到正慧小學示威，現未能準確評估秩序情況，考慮到安全問題，所以未能安排大家進入內採訪」，冇解釋到記者點解會對學校構成安全問題。教育局今年已經幾次留難傳媒，1月時連份小一統一派位中心名單都一直扣起，要記者搵局長吳克儉先至肯提早多一日畀傳媒。