紀念六四26周年嘅集會前晚結束，今年參加人數少過舊年，各黨派嘅籌款成績有升有跌，其中主辦晚會嘅支聯會一共籌得134萬，較去年下跌兩成，不過籌款成績仍然係冠絕所有政黨，籌款下跌嘅仲包括學民思潮，籌款金額下跌逾一成。今年所有政黨嘅成績全數增加，同屬工黨和支聯會高層嘅李卓人認為，係市民想畀足夠資源應付政改一戰。
支記獲捐134萬最多
每年六四、七一都係各大政黨籌款嘅最佳時機，因為上得街嘅絕大多數都係泛民支持者，選擇自己支持嘅黨派捐錢，不過同七一唔同，多數人都傾向捐錢比主辦六四紀念集會嘅支聯會，不過今年籌款金額由去年嘅170幾萬，減少至今年嘅134萬，支記話今年參加人數少咗兩成，同籌款下跌比例相約。排第二就係學民思潮，籌款達33萬，但也較去年少咗4萬。
政黨嘅捐款成績全數報捷，公民黨今年捐款增加四成，有近30萬蚊，工黨仲厲害，多咗一倍，由4.5萬激增至9萬蚊。社民連微升1萬，達25萬蚊。新同盟今年亦籌得5萬蚊。
同屬支聯會同工黨「高層」李卓人認為，市民知道泛民政黨要多啲資源應戰政改，所以將多啲捐款分配畀政黨。民主黨就一如既往，籌款成績係零，因為該黨秉承已故支聯會主席司徒華吩咐，每年六四紀念集會，全力協助支聯會，不為民主黨籌款。錯過咗六四集會捐款機會唔緊要，仲有唔夠一個月就係七一大遊行，大可以由維園捐到去金鐘。
另外，噚日支聯會副主席蔡耀昌搵八方，話有報道引述佢講，今年有本土派同港大另行舉行悼念活動，仲有學生喺維園集會上焚燒《基本法》，所以令支記籌款數字銳減，連黃之鋒都喺fb引用埋，狗哥好㷫話佢絕冇咁講過，完全係老屈，要公開澄清以正視聽。
mailto:[email protected]
李八方