立法會前排訂出咗紅、黃色警示系統，一旦有警示嘅時候，任何人等包括議員在內，進入大樓前都要先做安檢。建制派議員林大輝噚日就試過，點知佢過唔到金屬探測器嗰關。
隨住政改決戰時刻即將來臨，立法會秘書處噚日專登同傳媒講解吓，一旦出現紅、黃警報時嘅安檢安排。做安檢包括要過將行李放喺X光機，人就經過金屬探測器，同上飛機冇乜分別。
噚日大輝一行過個金屬探測器就有嘟嘟聲，需要人手再掃一次，大輝就笑笑口可能話佢隻鋼牙出事。八方亦都試過，但就因為放咗電話同硬幣喺袋，同樣要人手掃一次，成個過程要分幾鐘。秘書處為咗方便傳媒做嘢，有通行證嘅記者會獲得優先處理。