金融海嘯之後，好多大行嘅行政總裁（CEO）都被減薪，甚至炒魷魚，不過摩根大通CEO戴蒙係異數，竟然喺逆境之中，身家突破10億美元！
摩通股份近日喺歷史高位徘徊，帶挈戴蒙持有股份升值至4.85億美元，根據彭博富豪榜，戴蒙身家增至11億美元（85億港元）。
一直以來，金融界富豪唔少都係對沖基金同私募基金創辦人，好似排名24嘅金融大鱷索羅斯，之前就係對沖基金經理，身家285億美元；黑石集團聯席創辦人Steve Schwarzman身家都有134億美元。
反觀投行CEO嘅身家就甚少超過10億美元，而且金融海嘯之後，唔少大行掌舵人都被清算要落台，戴蒙能穩住陣腳，舊年仲袋走2,000萬美元薪酬，唔怪得英國《金融時報》都叫佢做「華爾街最後一個皇帝」喇。