15隻內銀股嘅PE，已經夠晒低，而重慶銀行（1963）嘅PE，更加平絕內銀股行列，兼且唔係港股通嘅成員。博落後，再博中港通擴容事在必為，重慶行獲納入可買賣股份，俾北水掃到甩晒轆。
場內專業評估，重慶行今、明兩年EPS 1.47元同1.64元，明年預測PE得4.8倍，香江場內14隻內銀，明年平均預測PE，係6.1倍、祖國掛牌嘅內銀，係7.7倍。重慶行PE平霸！
深港通一開勒唔住
重慶行唔係港股通可買賣股份。但睇佢背景，重慶行大股東重慶渝富資產，其他主要股東重慶市水利投資同重慶市地產，均直屬重慶市國資委，所謂根正苗紅兼係超級大孖沙股東。又深港通在不久將來會好快開波，市場已經有呼聲建議擴容，而祖國報章就估計，下一批獲納中港通買賣股份，包括恒指小型成份股指數。重慶行亦係恒指綜合小型股指數成份股。
重慶行家陣H股嘅總市值，得91億元，扣埋大新金融（440）所揸一撼4.58億股H股（等值36億元），實際街貨市值，得55億元。諗到係，中港金融決策機構研究擴容，對好似重慶行呢類本身係H股，加埋份屬市政府或者直屬央企香港上市公司，獲納買賣名單，機會十分高。又重慶行H股市值細奀，若北水真係有機會買重慶行，重慶行嘅股價好易一支箭。
之前講過，2007年火爆期，內銀好似建行（939），PE炒到上33倍、工行（1398）36倍，交行（3328）44倍。再講一次，重慶行明年PE得4倍單位數！好似2007翻版，重慶行係講緊要升500%到50蚊。
就算唔講資金市因素，比硬數據，單係買折讓，重慶行上番祖國上市內銀平均7.7倍PE水位，現價（7.94元）60%，到12蚊樓上。
錢雋
細價股專家
本欄逢周一、三、五刊出