明晚歐聯決賽喺筆者眼中，一個賣點已值捱夜，就係全程捕捉美斯（圖），點樣帶領今季已入120球嘅MSN組合，攻陷鋼門保方把守嘅祖記大門。筆者估計巴塞法定時間可順利捧盃，保「狂牛」兵團寫下近10季入決賽必封王嘅金漆招牌。
對上10季，號稱歐洲四大聯賽嘅「英意西德」，恰如其分包攬全部20個決賽席位。巴塞又入決賽，唔係粉絲都會認同好睇，筆者亦無法不想起06年決賽，阿仙奴喺被看低一線下，早段有門將列文被趕出場仲能夠領先下，終俾巴塞末段反勝封王。當年巴塞未有美斯，沙維齋坐後備席；「小白」恩尼斯達下半場後備登場。往後巴塞有天王美斯壓陣，霸氣盡現，09同11年決賽再鬥英超隊，球王皆有士哥，皆擊倒曼聯。連同上季皇馬內訌戰，加時大勝馬體會封王，西班牙球會近10季四入決賽必捧盃而回。
祖記今季12場歐聯只失7球，又有路人皆知嘅鋼門保方把關，矛盾之戰似乎各擅勝場。不過美斯實在太恐佈，今個月先夠28歲仲係咪進步緊，有得拗，但個人式金球不斷；前線多埋阿蘇同尼馬，呢個巴塞全南美MSN組合，令美斯減輕壓力下，竟然全季聯賽未缺席過一場；中場多咗上屆歐霸盃決賽最佳球員拿傑迪錫，巴塞攻守平衡得多，全季聯賽比上季入多10球少失12球。季尾巴塞越戰越勇，失波多嘅球賽，僅係準決賽首回合大幅領先拜仁下，次回合hea踢敗走德國，同聯賽無關痛癢和拉科，祖記鋒線僅用31歲嘅泰維斯夾西班牙新星艾華路莫拉達，前鋒級數被比下去。
防守上，祖記近日操練有防守重將基亞連尼受傷，冇咗佢做屏障，保方更頭痕；該隊四強作客偷到皇馬一個作客入球，係對手今季防守常犯錯誤致三大皆空嘅主因，巴塞必引以為鑑。祖記平均年紀達29.8歲，比巴塞大2.4歲，若巴塞加快行軍速度，祖記一班老人家未必易捱。佢哋以守力稱著，但對上七場皆失波，勢頭明顯轉弱。
策略上，美斯連續三場波開「首球」， 2.75倍可試。今年單數年，夏天歐洲冇重要足球下，季尾唔少盃賽決賽都見大手交易，祖記未必死守，任美斯宰割；巴塞讓到半/一低水極狠，計值博率可冷敲小勝一球，波膽取2:1、3:1。
文：波神