向來與無綫合作無間，亦被視為福將的歐陽震華（Bobby），日前有報道指他被藝員部不獲續約，結束多年部頭合約關係，事後有指無綫管理層知道此事後大為震驚，並派出戲劇製作總監曾勵珍處理兼傾續約，昨日曾聯絡Bobby了解此事，不過直到截稿前未有回覆，其後再聯絡他的經理人，她在電話上說：「其實我哋早幾日已經同珍姐有初步接觸，今（昨）日亦都有聯絡，我哋都唔係好明個原因，覺得有啲問題，所以都希望了解吓，我哋同珍姐會約時間見面。」
陳豪：佢係忠臣
對於Bobby不獲續約，陳豪昨日在將軍澳出席活動，亦被問到此事，最初他表示未看過報道，當他了解後並說：「Bobby係我哋以前講嘅大哥，佢真係一個忠臣，同TVB合作咗好耐，我都係睇佢長大，如果佢真係不獲續約，我會覺得係可惜，我好欣賞Bobby，係一個好有份量嘅演員，如果冇咗會覺得可惜。」
問陳豪會否覺得有點奇怪？他續說：「我唔知呢個消息真確性有幾多，但係我聽到會覺得意外，佢有份量， 演出又得到肯定，除非佢自己話唔續約，如果唔係見唔到有其他原因話唔同佢續約，𠵱家啱啱有消息傳出，我諗不如等公司同佢接觸，斟酌返合約上嘅嘢，至於係咪一時之失，我都唔係好敢講，但係流失咗佢會好可惜。」
至於陳豪本身的合約，他笑說：「我啱啱續咗約，商業秘密咁耐，要過一段時間先。」他更透露太太陳茵媺目前仍有合約在身，作為丈夫同粉絲，很支持她拍戲，但當他聽到太太復出時會否又有喜？他哈哈大笑：「嘩，多謝你呀，係喜事呀。」
採訪：張曦彤
