長和（001、又叫一號仔）與和黃（已除牌）完成世紀重組，分拆出嚟上市嘅長江實業地產（1113）前日亦正式掛牌，有趣嘅係，長和高層對於長江實業地產嘅簡稱似乎十分在意，上月曾出通告，指佢哋嘅中文股份簡稱係長實地產，而非長地；長和大公關見噚日有報章繼續寫長地，直情打電話去做個溫馨提示，建議不如寫「長實」喎。
喺重組之前，大家都習慣叫一號仔做長實，𠵱家一號仔變成長和，而持有地產業務嘅上市公司係長實地產，如果叫長實地產做長實，好容易令人誤會係講緊以前嗰隻一號仔吖嘛。唔通老闆超人李嘉誠對長實好有情意結，見到市場轉用長和、長地呢兩個名，冇再提長實二字，心有戚戚然，所以千叮萬囑公關同事，要確保長實呢個名唔會因為重組而被遺忘？