【本報訊】這個六四，學聯退出維園燭光集會，港大學生會首度退守校園內悼念六四。壹傳媒創辦人黎智英昨出席維園集會時坦言，不明白其他人想法，「我哋追求都係自由民主，雖然都要集中香港（維園）呢邊，但係代表咗我哋精神，咁多年追求嘅嘢」。有人認為中國民主與香港無關，黎表示：「有啲本地（土）派……可能係『佢哋』自己人都唔定」。昨有13.5萬人出席維園集會，他認為已算不錯。
「共產黨喺度搞分化」
悼念六四，浮現出世代的分歧，上一輩的港人大多不明白學生的想法。78歲的林伯昨午1時已到維園，他坦言部份學生、本土派在其他地方悼念六四，「係中咗共產黨計」。他說：「共產黨喺度搞分化，搞到啲學生唔嚟維園，其實要多人共產黨先驚，嚇一嚇佢哋都好，分散咗就冇力量！」
55歲的士司機黃先生出席維園燭光集會多年，他指最近大學學生會退聯，又不出席維園集會，做法錯誤、幼稚，對於部份年輕人不認同要建設民主中國，他認為這想法「冇腦」，「中國冇民主，香港點會有民主！」
教師黃先生一家四口到維園集會，提到六四屠城，他忍不住哽咽，「我唔明點解會咁殘忍對待追求民主嘅學生」。堅守維園，除悼念烈士，也為支持支聯會多年的堅持，「有人覺得維園太過形式化，但呢個係傳統，全世界、中國，每年都睇住維園！」
65歲的許伯26年來風雨不改到維園悼六四。1989年他從事冷氣工程，當年得知屠城後立即拉閘去遊行，「有生意都唔做，唔出嚟都唔係人」。從此他每年六四都不開工，到維園。對於學生退聯、不到維園，他認為是：「共產黨喺度搞分化，大家要集中力量，共產黨真係驚㗎」。
■記者譚靜雯、王家文