唔講唔知，原來要一次過見到晒本港四大地產家族嘅富二、三代或者代表，去東亞銀行（023）嘅股東會應該就有好大機會嘞。
東亞董事會19名董事當中，有四位就係來自本地地產家族，包括非執行董事恒基地產（012）主席李兆基大仔李家傑，擔任獨立非執董嘅長和（001）主席李嘉誠細仔李澤楷、新世界發展（017）創辦人鄭裕彤女婿杜惠愷，同埋信置（083）主席黃志祥大仔黃永光。
其實黃永光今個月先至被委任入東亞董事會，佢2005年加入信置幫手，一直顧住自己家族業務，今次第一次做上市公司獨董。不過兩家應該交情唔錯，東亞主席李國寶大仔李民橋都係信置獨董，𠵱家互相去對方公司做獨董，幫小股東監察公司囉。