呢一場政改，真係搞到人都癲，相信呢個唔只係普羅市民嘅心聲，亦都係官場心聲，甚至乎係掌管政改嘅政務司司長林鄭月娥心底話。噚日公民黨去見林鄭同政制及內地事務局長譚志源傾政改，公民黨毛孟靜話留意到，林鄭月娥消瘦咗好多，樣子比起以往憔悴，相反譚志源卻是越嚟越肥，個肚腩越嚟越大，Miss Mo話，從身形反映到二人如何處理壓力。
林鄭見泛民 稱變得沮喪
噚日林鄭月娥接見公民黨，以一身鮮藍色外套迎戰，擺明就係戰鬥格，Miss Mo就以一身黃衣迎戰。不過，女人個樣呃唔到人，Miss Mo話留意到林鄭漸見消瘦，相反譚志源就越嚟越肥，即使着住鬆身西裝都掩蓋不住：「有壓力嘅時候，有人就越來越瘦，有人就越嚟越增磅，可能覺得情緒唔好，要食多啲嘢啩。」
Miss Mo話，林鄭席間透露因為今次政改問題，變得沮喪，難怪成個人瘦成咁，至於譚志源，Miss Mo話，見證住譚志源個肚腩一次大過一次，睇嚟佢應該好食兼好瞓。
以往有不少泛民同建制派議員會見林鄭時，都大表關懷之情，希望佢好好保重身體。因為大家明白，政改點郁都係阿爺話事，林鄭只係推手，一係繼續做，一係就唔撈
。而且，不少議員同林鄭做政務官時已相識，識於微時有交情，故私下都會噓寒問暖，呢種關係同與梁振英勢不兩立、見到面唔會打招呼嘅敵我矛盾，相去甚遠。
李八方
mailto:[email protected]