六四26周年嘅紀念集會，各泛民政黨組織喺維園入口擺下多個街站，八方現場所見，「主場」支聯會嘅大站最多市民主動上前捐款，今年支記推出四款T恤及民主女神像擺設，全數以100蚊出售。
銅鑼灣及天后港鐵站外是各「兵家必爭」之地，沿路旗海，公民黨余若薇、陳淑莊拍住上嗌咪頗受歡迎，佢哋件「生於亂世 有種責任」T恤有親子裝，特意印製小童size，每件賣89蚊，銷情睇嚟唔錯。
不過公民黨毛孟靜就慨嘆，今年人流明顯疏落，6點半過後天后站外不如往年般塞滿準備入維園嘅市民，「我同後生仔講，我哋唔可以畀維園嘅燭光失色」。
另外，今年六四與雨傘運動結合，唔少攤檔都有雨傘紀念品，好似人民力量就賣遮，亦有唔少攤檔寄賣佔領運動嘅相關書籍，亦有市民自發印「不要假普選」T恤，以成本價出售，希望市民喺今個月17日穿上參與立法會外嘅集會，要求議員否決假普選方案。