噚日A股市況，令筆者真正悟出「來回地獄又折返人間」嘅意思。此類型嘅市，真係令人又愛又恨，愛佢波幅大，恨佢唔知想點，不過，兩市成交都仲有差唔多兩萬億人仔，證明愛佢波幅大嘅人仲有好多。
阿爺已經為股市定調大方向係慢牛，正如上次所講，阿爺三不五時為個市降吓溫，已經係新常態，至於中間出現波動是常識吧！
嚟到6月份，阿爺放水已經有一段時間，除咗股市會有即時反應之外，理論上房地產亦都會受惠，不過，之前阿爺又限購，又提高首付，令到樓價升唔起之餘，成交亦下跌。
不過，隨着宏調政策放寬，情況開始轉變，國家統計局數據顯示，70大城市的樓價，按年錄得上升嘅城市，已經由1月嘅2個，增加到4月嘅18個。土地價格方面，根據易居房產研究院數據，北京、上海、廣州及深圳等十大典型城市成交建築面積按月增加67.4%，雖然以成交價計，一線城市土地成交每平方米均價按月仍有下跌，但成交明顯多咗，斷估都唔係一兩間公司自已造出嚟，又如果發展商唔睇好後市，都費事拎錢出嚟投啦，畫公仔唔洗畫出腸啩。
流氓