政改就快表決，政務司司長林鄭月娥將就政改同泛民會面，但估唔到建制派會因為冇得見而呷醋。經民聯主席梁君彥噚日同八方講，當佢一聽到政制及內地事務局局長譚志源話政務司司長林鄭月娥又再接見泛民，即時WhatsApp向譚志源投訴，不滿建制派不獲接見，即時嬲豬。
譚志源噚日回應話，已回應梁君彥講咗平日已經常同佢見面，話如果任何建制派想同林鄭會面，佢哋係無任歡迎。查實即使林鄭唔見梁君彥「又如何」？唔通梁君彥會因為咁而就政改投反對票咩？其他建制派就識做好多，例如民建聯葉國謙話，呢啲機會留番畀泛民，工聯會黃國健就話，政改快將表決，體諒政府唔再接見佢哋。