頭三場開晒一檔馬win，到第四場三班千二米，唔再係一檔馬威，事關今場一檔馬「神舟小子」弱配黃皓楠，雖則畀落飛黨打到着晒啡燈，但始終人馬均首次跑快活谷，結果起步慢一慢，敗象已呈，皓楠仔唔能夠打響谷草頭炮。
呢場1檔馬唔掂，但就畀1號馬攻陷咗，1號馬告廐「環保戰士」一落四班用番最佳拍檔韋達，即刻重拾上屆跑馬地百萬挑戰盃冠軍本色，孭住133頂磅拉士一鼓作氣，及時追過走甩咗之藝人曾志偉團體馬「卡加動力」，3.4倍大熱門打開今季勝門，亦造就今晚大熱門馬由頭場贏到第四場仲未斷纜。
「卡加動力」閘前落飛着綠燈，薛寶力騎到一絕都要輸，騎者頭四場三度上名冇馬贏，而「卡加動力」繼上次放到最後輸頭位屈居亞軍之後，今次11倍快放又一次埋唔到尾，輸短馬頭位又一次做二奶，曾志偉這匹愛駒跑了兩季12仗仍未出頭。
今場三、四名是一對最大冧巴輕磅馬，12號「星際武士」跑第三，11號「栗馳駒」第四，四重彩熱頭冷腳派四萬七千幾。