新世界發展（017）第三代接班人鄭志剛熱愛藝術，佢2007年加入公司，首個擔大旗嘅項目尖沙嘴商場K11就以藝術掛帥，估唔到佢將呢個藝術氛圍帶到去旗下服務式住宅。
將會喺8月入伙嘅跑馬地桂芳街8號服務式住宅Eight Kwai Fong，由鄭志剛一手策劃，噚日開放示範單位，無論由地下大堂、會所抑或房間都放滿由世界各地搜羅，或者由本地藝術家創作嘅藝術品、陶瓷同畫作，儼如藝術展覽。
最吸睛嘅作品，係放喺地下花園嘅大型裝置藝術Giant Bowler Hat，一隻巨型雞蛋戴住一頂紳士帽，企喺大廈對出成和道都會望到。仲有一部全港只得兩部嘅黑膠唱片機Brionvega Radiofonografo，據聞係全人手製作，音色獨特。
Eight Kwai Fong都有古仔，呢個項目原先當住宅賣，3年前已部署賣樓花，鄭志剛最後決定改成服務式住宅作長線收租，順便宣傳自己嘅藝術理念。項目現正招租，最細320方呎開放式單位月租2.65萬起。