宏利（945）小職員，網上出Post外判公司晚宴影片，宇宙級製作，罐頭級價錢。呢個對影片製作嘅無知案例，當然算係非常極端。不過只要是但捉個行內人去問，你就會知道，佢哋每日都面對唔少無知麻煩客。
案例一：美圖秀秀都做到
某公司搞咗個Event，仲邀請咗唔少城中名人出席，當中包括一個已經60幾歲嘅女名人。呢位名人雖然年屆六張，但經常被傳媒讚Keep得好，冠以「美魔女」稱號。不過，所謂上鏡靚過真人，呢位女名人真人其實將面皮拉到不能再假，而且仲要係好殘。
咁重點來啦，某Production House接咗呢個Event公司嘅大會影片攝影Job，本來條片冇咩大問題，但當尊貴嘅客戶，見到過鏡嘅呢位女名人殘到一個點，就提出以下要求：「你拍到佢咁殘，你用美圖秀秀、Photoshop執咗咪得囉。美圖秀秀都做到，你哋專業，冇理由做唔到。」
喂，第一，美圖秀秀係執相的，第二，你出嘅錢係Event budget，冇理由逐格幫你執啩。
案例二：又要威又要戴頭盔
某公司拍條廣告，仲雄心壯志一定要喺條片度「寸」對手，大膽地要擺人哋個產品出嚟，影射對手。
某Production House接呢單Job，不過提醒個客，「你咁樣未必過到TVB。」「唔怕！照拍！」
於是做到後期時，Production House就將對家嘅產品轉咗顏色。呢個時候，尊貴嘅客戶就開始淆底，「咁樣又好似太似，怕出事。」於是，又轉埋對家產品嘅設計，客戶就話，「咁樣又睇唔出係對家，影射唔到。」
如是者，糾纏咗好耐改了又改，最後客戶決定：「都係唔好啦，將件產品打格！」
案例三：隻黑唔夠黑，隻白唔夠白
某公司拍一個廣告，要顯示出廣告主角烏黑亮麗嘅秀髮，好啦，拍完出嚟，個客指住演員黑色嘅頭髮話，「啲頭髮唔夠黑。」
另外亦有個案係，某平面廣告，設計好晒，執好晒，然後指住個底色話，「隻白唔夠白」，但明明嗰度係根本冇嘢，即係CMYK色碼最白嗰隻白。
案例四：影像平衡嘅嘢……
某公司拍廣告，佢想喺一個畫面度，突出兩樣嘢，分別係A物件同B物件。拍完，個客睇番，就話：「我覺得依家A唔夠出，B搶眼過A，我要Balance啲。」
於是Production House就喺A度加多少少效果，然後客又話：「依家就唔得，A太出，B變得唔顯眼，我想B出番啲。」然後A同B連番角力，Production House就不斷輪住喺A同B度加Effect，結果將A同B兩件野，都放到雞乸咁大件，客表示：「收貨，非常好。」
案例五：Agency不懂揣測主子的心意
大公司要拍廣告，好多時都會通過Agency搵Production House去做。咁樣Agency就會同Production House傾到晒廣告內容，「得嘅，個客唔理用邊個Cast（即係藝人）嘅。」「得嘅，個客對個景冇大意見，唔Concern。」
好啦，去到開機先兩日，Agency同Production House講，「個客話唔想要呢個景，同埋呢個（明）星，要轉晒佢。」
另外，亦有Production House試過，拍完後，尊貴客戶先話，「我都係唔鍾意個Main Cast」。最後Production House唯有減個Main Cast嘅戲份。
案例六：宣傳易價錢、史詩式大製作味道
好多時，Production House都會收到呢電話：
客：「我想問拍一條片要幾錢？」
製：「你想拍啲咩？拍幾長？點拍？」
客：「我未有idea，你不如俾個Range我。」
製：「如果廣告，幾萬又有，幾十萬又有，幾千萬都有。」
客：「幾分鐘都都要幾萬蚊呀？幾千蚊得唔得？」
仲有唔少人係希望以宣傳易價錢，拍出史詩式大製作味道嘅廣告。
案例七：貪玩的客戶
正常Production House做每個Step都會俾客過目一下，好似錄VO（Voice over旁白），都會叫個客去一齊跟去聽。好啦，佢一路錄，個客就走去Production house其他地方拎電話影啲無謂嘢，掛住自己玩，去到播Playback時，「呢個唔係我想要嘅嘢，做咩唔俾我聽咗先？」
記者：倪敏慧