建制派好鍾意掛橫額宣傳成功爭取到啲「雞毛鴨蒜」事情，而財爺鬍鬚曾喺2月財政預算案中提出引入美食車，經民聯林健鋒噚日喺立法會上率先邀功，自稱美食車建議係佢哋向鬍鬚曾提出，仲話鬍鬚曾問咗好多問題。點知民建聯漁農界議員何俊賢跟住話，早喺去年佢哋去過美國之後，返嚟同政府提出美食車概念，政府畀咗正面回應，仲納入預算案，好明顯佢唔想林健鋒攬晒功勞。
講吓講吓，議員講到年前農曆新年時出現嘅深水埗桂林夜市，工聯會陳婉嫻問食衞局局長高永文，流動小販食物車可唔可以變成美食車。高永文反駁話呢啲食物車係無牌小販，涉及公共衞生，指「深水埗區議會有強烈聲音反對類似形式」。民望高呢句話係有骨㗎，因為反對桂林夜市嘅咪係建制派囉。