呢排國際球壇最矚目嘅，當然係國際足協連環爆發涉貪醜聞，白禮達最終喺日前辭咗職，不過呢位老人家同我哋偉大特首有同一個特質，就算管轄組織有咩問題，都唔係佢管理出咗問題，正如大埔有虐老老人院，係土地問題，所以國際足協有貪污，都可能係角球旗問題。
國際足協再爆貪污醜聞後，小弟個面書充斥片段，回顧唔少懷疑白禮達縱容嘅國際球壇假波事件，最經典就係02年世界盃，南韓受到球證全方位照顧下，分組賽剋死葡萄牙，淘汰賽剋死意大利、西班牙，有啲年輕球迷仲留言，原來當年咁黑暗，以後罷用南韓手機云云。回帶當年，最慘都要算係意大利，以嗰陣嘅人腳，前線有恩沙基、韋利，中場有托迪校炮，後防有馬甸尼、大簡、尼斯達三中堅組合，比較番𠵱家意大利國腳，真係差天共地，數埋門將，就係𠵱家仲幫祖雲達斯把關嘅保方。
把握最後機會
上天都叫公平，06年意大利都贏番世界盃，保方、大簡、托迪等都叫有番安慰。事實上，保方嘅履歷，國家隊只係爭歐國盃冠軍，球隊就只係爭歐聯。保方23歲已經過檔祖記，踢到今時今日，唔係冇低潮，祖記因為電話門降班，佢亦一直留守，唔係冇人搵，皇馬、曼城、阿仙奴等都傳過想買佢，但仍然冇走到。雖然唔似得沙維，球員生涯仲有機會爭歐聯，但本身已經37歲，而且以祖記班底，再入多次決賽真係唔易，相信係最後一次拎歐聯冠軍機會，上天又會唔會幫多佢一次？
文：牽牛